జెఫ్ బెజోస్ మాజీ భార్య ఉదారత.. షరతులు లేకుండానే కోట్ల డాలర్ల సాయం

అమెజాన్ వ్యవస్థాపకుడు జెఫ్ బెజోస్ మాజీ భార్య, ప్రపంచంలోని ప్రముఖ దాతృత్వవేత్తలలో ఒకరైన మెకంజీ స్కాట్ ఈ-కామర్స్ దిగ్గజం అమెజాన్‌లో తన వాటాను భారీగా తగ్గించుకున్నారు. సేవా కార్యక్రమాలకు, ముఖ్యంగా వైవిధ్యం, సమానత్వం, సమ్మిళితత్వ (DEI) కార్యక్రమాలకు నిధులు సమకూర్చడంలో భాగంగా ఆమె ఈ నిర్ణయం తీసుకున్నారు. గత ఏడాదితో పోలిస్తే ఆమె దాదాపు 58 మిలియన్ల షేర్లను విక్రయించడం లేదా విరాళంగా ఇవ్వడం ద్వారా తన హోల్డింగ్స్‌ను 42 శాతం తగ్గించుకున్నట్లు సెప్టెంబర్ ఎస్‌ఈసీ ఫైలింగ్ వెల్లడించింది.

ఈ ఫైలింగ్ ప్రకారం ఏడాది క్రితం 139 మిలియన్లుగా ఉన్న ఆమె షేర్ల సంఖ్య ఇప్పుడు 81.1 మిలియన్లకు చేరింది. ప్రస్తుతం ఆమె వాటా విలువ సుమారు 12.6 బిలియన్ డాలర్లుగా ఉంది. 2019లో బెజోస్‌తో విడాకులు తీసుకున్నప్పుడు ఆమెకు అమెజాన్‌లో 4 శాతం వాటా లభించింది. అయితే, ఒప్పందం ప్రకారం ఆ షేర్లకు సంబంధించిన ఓటింగ్ హక్కులు జెఫ్ బెజోస్ వద్దే ఉన్నాయి. ఈ షేర్లను విక్రయించారా? లేక నేరుగా విరాళంగా ఇచ్చారా? అనే విషయంపై ఫైలింగ్‌లో స్పష్టత లేదు.

మెకంజీ స్కాట్ ఇప్పటివరకు జాతి సమానత్వం, LGBTQ+ హక్కులు, ప్రజాస్వామ్య పరిరక్షణ, పర్యావరణ మార్పులు వంటి అంశాలపై పనిచేస్తున్న సంస్థలకు 14 బిలియన్ డాలర్లకు పైగా విరాళం ఇచ్చారు. ఇటీవల హోవార్డ్ యూనివర్సిటీకి 80 మిలియన్ డాలర్ల భారీ విరాళం ప్రకటించారు. ప్రభుత్వ షట్‌డౌన్ కారణంగా ఫెడరల్ నిధులు నిలిచిపోయిన క్లిష్ట సమయంలో ఈ విరాళం ఆ వర్సిటీకి ఎంతగానో ఉపయోగపడింది.

మెకంజీ స్కాట్ విరాళాల విషయంలో ఒక ప్రత్యేక పద్ధతిని అనుసరిస్తారు. ఆమె ఇచ్చే నిధులకు ఎలాంటి షరతులు విధించరు. దీనివల్ల సంస్థలు తమ అవసరాలకు అనుగుణంగా ఆ డబ్బును స్వేచ్ఛగా ఉపయోగించుకోవడానికి వీలు కలుగుతుంది. గత ఐదేళ్లలో 2,000 కంటే ఎక్కువ లాభాపేక్ష లేని సంస్థలకు 19 బిలియన్ డాలర్లు విరాళంగా ఇచ్చినప్పటికీ, ఆమె సంపద ఇప్పటికీ 35 బిలియన్ డాలర్లకు పైగా ఉంది.